Ik ken ain oardig plekje
Op't vlakke waaidelaand
Waor 't goud is om te leven
Ien 't Grunninger ommelaand
De noam, dei ken ie roaden
Auwerd hait 't sinds olle tied
An d'aine kaant de stroatweg
't Groot kenoal aan d'aander zied
De kerk, dei stait zo kriegel
Over bleev'n oet olle tied
Groot en stoer stait hai al aiwen
'n Boaken was 't veur wied en zied
Joarn zel e doar nog weez'n
Of wie goan noar Oost of West
Hai wil allein moar zeg'n
Blief hier, want 't is hier best.
De mensen, dei der wonen
Dei binn'n stoer en staark.
Zai hollen nait van proaten
Moar bliev'n bie heur waark
En summers onder 't drokste
Is alles in de weer
Loop heur nait veur de vouten
Want 't gait er donders heer
Moar as der feest ien 't dörp is
Den mout ie ais wat zain
Den binn'n ze aalmoal bliede
Ien hoes blift er gain ain
Den is 't ain grote bruloft
Zai zingen mit mekoar
Van dörp en volk van Auwerd
En blieven bie mekoar
Ik hol van mien klein dörpke
Dat ploatske dicht bie stad
Woar ik as kind al speulde
Woar ik altied 't laifste zat
En woar ik ook mag raizen
Ik denk toch ieder keer
Zag 'k eerst de olle hoezen
Van ons Auwerd toch moar weer
Met dank aan Roelf Pijpker, voorzitter Dorpsbelangen
(Waarschijnlijk is dit geschreven door meester Boekhold, oud hoofd van de Openbare School. Wanneer dit lied precies geschreven is en de melodie ervan is onbekend. Wie weet hier iets over te vertellen?)